| اسلام آ باد (نیوز رپورٹر) فیڈرل گورنمنٹ ایمپلائز ہاؤسنگ اتھارٹی کے ایگزیکٹوبورڈ نے سیکٹر جی تیرہ کے ایفرو پراجیکٹ کا آڈٹ کرانے کی منظوری دیدی ۔ یہ منظوری گزشتہ روزوفاقی وزیر برائے ہاؤسنگ و تعمیرات ریاض حسین پیرزادہ کی زیرصدارت ہونے والے اجلاس میں دی گئی قانونی تقاضے پورے ہونے کے بعد اتھارٹی کام کو پایہ تکمیل تک پہنچائیگی ۔ سیکرٹری ہاؤسنگ و تعمیرات ڈاکٹر شہزاد خان بنگش نے بھی اجلاس میں شرکت کی۔ ڈائریکٹر جنرل ہاؤسنگ اتھارٹی، کیپٹن (ریٹائرڈ)محمد ظفر اقبال نے اجلاس کو بریفنگ دی۔ اجلاس میں ایفرو(EHFPRO) پروجیکٹ سے متعلق پیش رفت پر تبادلہ خیال کیا گیا۔ ڈائریکٹر جنرل ہاؤسنگ اتھارٹی نے بورڈکو آگاہ کیا کہ ایفرو(EHFPRO) نے گزشتہ 14سالوں سے تعمیراتی کام کو التوا کا شکار رکھا۔کام جولائی 2017 میں شروع ہوا اور 2021میں مکمل ہونا تھا۔2021سے اب تک کا م بند پڑا ہے۔جس کی وجہ سے ہاؤسنگ اتھارٹی نے ایفرو کے کام کو بند کر دیا۔اب تمام قانونی تقاضے دور ہونے کے بعد ہاؤسنگ اتھارٹی خود اس کام کو پایہ تکمیل تک پہنچائے گی۔اور الاٹیز کو جلد از جلد قبضہ دینے کا پروسس مکمل کرے گی۔ الاٹیز کے مفاد اور سہولت کو مدنظر رکھتے ہوئے، اس منصوبے کا مکمل کنٹرول ہاؤسنگ اتھارٹی نے اپنی تحویل میں لے لیا ہے۔ اور متفقہ طور پر فیصلہ کیا گیا کہ ایفرو(EHFPRO) کا جلد از جلد آڈٹ مکمل کیا جائے۔ اجلاس کو بتایا گیا کہ بعض معاملات قانونی چارہ جوئی کے مرحلے میں داخل ہو چکے ہیں، جن کی آئندہ سماعت 18 مارچ 2025 کو مقرر ہے۔ بورڈ نے ہاؤسنگ اتھارٹی کی قانونی ٹیم کی کوششوں کو بھی سراہاجو ان امور کو خوش اسلوبی سے حل کرنے کی بھرپور کوشش کر رہی ہے۔دوسرا اہم ایجنڈا جے وی رولز (JV Rules) سے متعلق تھا۔ اجلاس میں اس امر پر غور کیا گیا کہ زمین فراہم کرنے والوں کو کسی قسم کی مشکلات کا سامنا نہ ہو اور ان کے لیے زمین فراہم کرنے کا عمل مزید آسان بنایا جائے۔ اس مقصد کے تحت، ہاؤسنگ اتھارٹی کے قواعد و ضوابط میں ضروری ترامیم کی گئیں تاکہ تمام ممکنہ مسائل کو حل کیا جا سکے۔ وزیراعظم پاکستان محمد شہباز شریف کہ ویژن کو پیش نظر رکھتے ہوئے اتھانی نے وقاقی ملازمین کو بر وقت زیادہ سے زیادہ رہائشی و کارو باری سہولتیں فراہم کرنے کا عزم کر رکھا ہے تا کہ ہر پاکستانی کے لیے اپنے گھر کا خواب اس کی دسترس میں ہو اور مستقبل کی جدید ضروریات سے استفادہ کر سکیں۔
|
|
