| لاہور(خصوصی نمائندہ)وزیراعلیٰ پنجاب مریم نوازشریف نے 19اضلاع میں پھاٹا کی سابقہ 23 ہاؤسنگ سکیموں کی بہتری اور بحالی کا حکم دے دیا۔وزیراعلیٰ کی زیر صدارت فری پلاٹ سکیم کے بارے میں خصوصی اجلاس منعقد ہوا جس میں 3مرلہ فری پلاٹ سکیم سے متعلق امور کا جائزہ لیا گیا۔اجلاس میں فری پلاٹ حاصل کرنے والے افراد کو گھر بنانے کے لئے قرض دینے کا بھی جائزہ لیا گیا۔ وزیراعلیٰ نے پھاٹا کو مارچ تک ہدف پورا کرنے اور ہاؤسنگ سکیموں کی بحالی کے لئے فنڈز جاری کرنے کے لئے اقدامات کی ہدایت کی۔ پنجاب ہاؤسنگ اینڈٹاؤن پلاننگ ایجنسی کے ڈی جی نے تفصیلی بریفنگ دیتے ہوئے بتایا کہ اپنی چھت، اپنا گھر پروگرام کے تحت قرضوں کی واپسی شروع ہوچکی ہے۔اپنی چھت، اپنا گھرپروگرام کے تحت لیے گئے قرضوں کی واپسی کا تناسب 100فیصد ہے۔ پنجاب میں اپنی چھت، اپنا گھر پروگرام کے تحت 9661 گھر زیر تکمیل ہیں۔ وزیراعلیٰ نے کہا کہ بے گھر عوام کے لئے چھت فراہم کرنے کی بہت فکر ہے ، پانچ سال میں پانچ لاکھ گھر بنانے کا ہدف پورا کرنے کے لئے پرعزم ہیں ،وزیراعلیٰ کی ہدایت پر رمضان پیکج پر اضافی رقم لینے والوں کے خلاف سخت ترین کارروائی کا آغاز کر دیا گیا ہے۔ قصور، بھکر اور گجرانوالہ میں کارروائی کے دوران تین ملزمان کو گرفتار کیا گیا اورغیرقانونی دھندے میں ملوث ایجنٹس بلیک لسٹ کر دئیے گئے ۔ وزیراعلیٰ نے واقعہ کا سخت نوٹس لیتے ہوئے پولیس اور انتظامیہ کو سرچ آپریشن کرنے اور ملزمان کے خلاف قانون کے تحت کارروائی کی ہدایت کی اورکہا کہ نادار غریبوں سے رقم وصول کرنے والے کسی رعایت کے مستحق نہیں،عوام ایسی کسی بھی شکایت پر فوری 0800-02345 پر فری کال کرکے شکایات درج کرا ئیں۔ وزیر اعلیٰ نے چولستان میں جھگیوں میں آگ لگنے سے چار بچوں کے جاں بحق ہونے پر سوگوار خاندان سے دلی ہمدردی و تعزیت کا اظہار کرتے ہوئے زخمی خاتون کو بہترین طبی سہولتیں فراہم کرنے کی ہدایت کی۔وزیر اعلیٰ پنجاب مریم نواز شریف نے قصور میں اسکول جاتی 9 سالہ بچی مستفیرا بتول پر بہیمانہ حملے کا سخت نوٹس لے لیا۔ وزیر اعلیٰ کی ہدایت پر چیئرپرسن پنجاب ویمن پروٹیکشن اتھارٹی، حنا پرویز بٹ فوری طور پر چلڈرن اسپتال لاہور پہنچیں اور زخمی بچی کی عیادت کی۔حنا پرویز بٹ نے بچی اور اس کے اہلخانہ سے ملاقات کی، انہیں مکمل انصاف کی یقین دہانی کرائی اور مشکل وقت میں ان کے ساتھ اظہار یکجہتی کیا۔
|
|
