اہور ( جنرل رپورٹر )وزیراعلیٰ پنجاب مریم نوازشریف کی زیر صدارت صوبائی کابینہ کا22اجلاس منعقد ہوا ، ریکارڈ 91-ایجنڈا پوائنٹ زیر بحث لائے گئے ، کابینہ نے پہلاپنجاب ہندو میرج ایکٹ،رجسٹریشن رولز 2024 ء کی منظوری دے دی۔ وزیر اعلیٰ نے کاٹن،گنے کی پیداوار بڑھانے کے لئے ہنگامی اقدامات کی ہدایت کی ،پنجاب بھر میں تمام وہیکلزکی رجسٹریشن مہم شروع کرنے اور موٹر سائیکل کی سپیڈ کو 60کلو میٹر فی گھنٹہ تک محدود کرنے کا فیصلہ کیا گیا۔ 12ماہ کے بعدموٹر سائیکل کی انسپکشن اور سرٹیفکیشن کے لئے ترمیم کی منظوری دی گئی۔ پنجاب میں اپنی نوعیت کی پہلی”پنجاب آسان کاروبار فنانس“سکیم اور سی ایم پنجاب آسان کاروبار کارڈ کی منظوری بھی دے دی گئی۔ وزیر اعلیٰ نے آسان کاروبار سکیم کے لئے مفت اراضی دینے کااعلان کیا۔ آسان کاروبار کے لئے3کروڑ روپے تک بلا سود قرضے دینے کا فیصلہ ، ایک لاکھ بزنس سٹارٹ اپ کا ہدف بھی مقرر کر دیا۔ وزیر اعلیٰ نے سٹارٹ اپ کے لئے بزنس پلان بھی دینے اور پنجاب بھر میں ای وہیکلز کے لئے چارجنگ سٹیشن قائم کرنے کا حکم دیا،جامع الیکٹرک وہیکلز پالیسی طلب کر لی۔کابینہ نے قذافی سٹیڈیم کا نام تبدیل کرنے کا فیصلہ مستردکردیا۔ کابینہ نے ہونہار سکالر شپ کی کامیاب لانچنگ پر صوبائی وزیر ایجوکیشن رانا سکندر حیات کو شاباش دی۔ وزیر اعلیٰ نے کہا میرٹ پر آنے والے ہر طالب علم کو لیپ ٹاپ دینا چاہتی ہوں۔ وزیر اعلیٰ نے لیپ ٹاپ کی تعداد 40ہزار سے بڑھانے اورسیکنڈ ایئر اور تھرڈ ایئر کے طلبہ کو بھی ہونہار سکالر شپ دینے کے لئے فوری اقدامات کی ہدایت کی۔ اجلاس میں کسان کارڈ کی تعداد 5 لاکھ سے ساڑھے 7 لاکھ کرنے کی منظوری دی گئی۔ کسان کارڈ سے کیش کی لمٹ30 فیصد تک بڑھانے کی منظوری بھی دی گئی ، وزیر اعلیٰ نے کہا کہ کسان رل گیا کا بیانیہ پٹ گیا، پنجاب کا کسان خوش اور خوشحال ہے۔اجلاس کے دوران آگاہ کیا گیا کہ پنجاب بھر میں کاشتکاروں کو 9ہزار گرین ٹریکٹرز کی فراہمی مکمل کر لی گئی۔ کابینہ نے پنجاب چیف منسٹر سپیشل اینیشیٹو فار ڈائیلسزپروگرام کی منظوری دی جبکہ ڈائیلسز کے لئے فنڈز 7 لاکھ سے بڑھا کر 10لاکھ کر دئیے گئے۔ اوورسیز پاکستانیوں کے لئے جائیداد سے متعلق امور کے فیصلے کے لئے سپیشل عدالت قائم کرنے کی منظوری دی گئی۔ پنڈی گھیپ میں غیر ملکی ایکس پلورنگ کمپنی کو جعلی این او سی دینے پر کارروائی کی ہدایت کی گئی۔، بارکھان کے شہری کی درخواست پرمالی امداد کی منظوری دی گئی۔ پبلک پرائیویٹ سیکٹر میڈیکل ڈینٹل کالجز کے سیشن2024-25 کی ایڈمیشن پالیسی کی منظوری دی گئی ، اسلام آباد کے لئے 30سیٹیں مختص کرنے کا فیصلہ کیا گیا۔ سی پی اے ایشیا اور ساؤتھ ایسٹ ایشیا ریجنل کانفرنس کے انعقاد کے لئے ضمنی گرانٹ،جرنلسٹ سپورٹ فنڈ کی سیڈ منی بڑھانے اور نادار صحافیوں کی مالی امداد کے لئے مختص رقم بڑھانے،نوازشریف انسٹی ٹیوٹ آف کینسر ٹریٹمنٹ اینڈ ریسرچ ایکٹ 2024، پراپرٹی ٹیکس،ویلیو ایشن سسٹم کو رینٹل ویلیو سے کپٹل ویلیو پر منتقل کرنے،سپیشل ایجوکیشن میں ٹیکنیکل کیڈر کی 340آسامیاں پر بھرتی ، فاریسٹ سروسز اکیڈمی گھوڑا گلی اور پنجاب فاریسٹ سکول بہاولپور میں بھرتیوں، سکولوں کے لئے سکول ٹیچنگ انٹرنز ،فزیبلٹی سٹڈی اینڈ تفصیلی ڈیزائن آف ٹرنک/ آؤٹ فال سیور لئی نالاکے پراجیکٹ کے نام تبدیلی،سالانہ ترقیاتی پروگرام میں ڈاڈوچھہ ڈیم سے راولپنڈی کو پانی فراہم کرنے کی فزیبلٹی سٹڈی،تفصیلی ڈیزائن کی سکیم کی شمولیت ،سید محمد حسین جنرل کم ٹی بی ہسپتال ساملی مری میں ایڈہاک بنیادوں پر بی ایس 16 کی اسامیوں پر بھرتی، جی پی او چوک مال روڈراولپنڈی میں انڈر پاس تعمیر کرنے ،مختلف شہروں میں ڈبل ڈیکر بسوں کے ٹرمینل کی تعمیرومرمت کی منظوری اور کئی فیصلوں کی توثیق کی منظوری دی گئی، علاوہ ازیں وزیر اعلیٰ پنجاب سے پاکستان میں آذربائیجان کے سفیر خضر فرہادوف نے ملاقات کی، دوطرفہ تعلقات، تجارتی روابط، ثقافتی تبادلوں، اور مختلف شعبوں میں تعاون بڑھانے پر تبادلہ خیال کیا گیا۔ وزیراعلیٰ مریم نواز نے آذربائجان کے دورے کی دعوت قبول کرلی۔ ملاقات میں دونوں ممالک کے درمیان تجارتی اور سرمایہ کاری کے مواقع کے فروغ کے لئے مشترکہ کاوشوں پر اتفاق کیا گیا اور ثقافتی اور تعلیمی تعلقات کو مزید مضبوط بنانے کے عزم کا اعادہ کیا گیا ۔ |
|