| اسلام آباد(وقائع نگار)چئیرمین سی ڈی اے محمد علی رندھاوا کی زیر صدارت جمعہ کے روز بلیو ایریا پارکنگ پلازے اور کیپیٹل سٹریٹ (آرٹ اینڈ کرافٹ ویلج) کے حوالے سے اجلاس منعقد ہوا. اجلاس میں سی ڈی اے ممبران سمیت متعلقہ شعبوں کے سنئیر افسران نے شرکت کی. اجلاس میں کیپیٹل سٹریٹ کے ڈیزائن اور اسکو آپریشنل کرنے کے حوالے سے مختلف تجاویز زیر غور لائی گئیں.چیئرمین سی ڈی اے محمد علی رندھاوا نے کہا کہ کیپیٹل سٹریٹ کے روڈ انفراسٹرکچر پر جلد کام شروع کیا جائے. انہوں نے ہدایت کی کہ نیلام کیے گئے پلاٹس کو ڈویلپ کرکے رواں ماہ الاٹیوں کو قبضہ دیا جائے اور کیپیٹل سٹریٹ کے ڈیزائن اور پلاننگ کو مزید بہتر بنایا جائے.چیئرمین سی ڈی اے محمد علی رندھاوا کو بریفننگ دیتے ہوئے بتایا گیا کہ کیپیٹل سٹریٹ (آرٹ اینڈ کرافٹ ویلج) میں ایکسپو ہال، سیاحت، آرٹ اینڈ کرافٹ سٹالز، ایمفٹی تھیٹر، سینما گھر جیسی سہولیات بھی فراہم کی جائیں گی. چیئرمین سی ڈی اے نے ہدایت کی کہ کیپیٹل سٹریٹ (آرٹ اینڈ کرافٹ ویلج) کے باقی ماندہ تعمیراتی کاموں کو ترجیحی بنیادوں پر مکمل کیا جائے.اجلاس میں چیئرمین سی ڈی اے کو بلیو ایریا پارکنگ پلازے پر بھی تفصیلی بریفننگ دی گئی. اجلاس میں پارکنگ پلازے کے مختلف حصوں کے استعمال اور ذرائع آمدن کے حوالے سے مختلف تجاویز بھی پیش کی گئیں.چیئرمین سی ڈی اے محمد علی رندھاوا نے کہا کہ ریونیو کو بڑھانے کے لئے پارکنگ پلازے کی سپیس کو مثر طریقے سے استعمال کرنے کا پلان پیش کیا جائے اور پارکنگ پلازے کی فنشنگ، لفٹ سمیت الیکٹرکل کا کام بھی جلد از جلد مکمل کیا جائے.چیئرمین سی ڈی اے محمد علی رندھاوا کو بریفننگ دیتے ہوئے بتایا گیا کہ پارکنگ پلازے میں تقریبا ایک ہزار گاڑیاں پارک کرنے کی گنجائش ہوگی اور پارکنگ پلازہ دو بیسمنٹس سمیت گرانڈ اور 5 فلورز پر مشتمل ہوگا. اسی طرح پلازے میں تقریبا 64 دکانیں بھی تعمیر کی گئی ہیں.چیئرمین سی ڈی اے محمد علی رندھاوا کو بریفننگ دیتے ہوئے بتایا گیا کہ ابتدائی طور پر پہلے مرحلے میں بلیو ایریا پارکنگ پلازے کی آدھی دکانیں نیلام کے لئے پیش کی جائے گی اور پارکنگ پلازے کے روف ٹاپ پر اوپن ائیر ریسٹورنٹ اور کیفے کی بھی گنجائش ہوگی اسی طرح روف ٹاپ پر پیڈل کورٹ، سینما گھر سمیت ان ڈور تفریحی سہولیات بھی شہریوں کو میسر ہونگی اور شہریوں کو پارکنگ پلازے میں گاڑیاں کھڑی کرنے کے لئے مختلف دورانیہ کیلئے گھنٹہ، یومیہ، ماہانہ بنیادوں پر پارکنگ کی سہولیات فراہم کی جائیں گی |
|
