| سلام آباد (نامہ نگار خصوصی)قومی ایئرلائن کا یورپ کیلئے فلائٹ آپریشن ساڑھے 4 سال بعد بحال ہو گیا ، قومی ایئر لائن کی پرواز اسلام آباد سے پیرس کیلئے روانہ ہوئی ۔ وزیردفاع خواجہ آصف نے مسافروں کو الودع کرتے ہوئے کہا کہ وزیراعظم شہباز شریف نے پیرس کیلئے پی آئی اے کی پروازیں دوبارہ شروع کروانے میں اہم کردار ادا کیا۔ پی آئی اے ذرائع کے مطابق پہلی پرواز اسلام آباد سے پیرس کیلئے دن بارہ بجے روانہ ہوئی، پیرس آنے اور جانے والی پہلی اور دوسری پروازوں کے لیے فلائٹ بکنگ فل ہو چکی ہیں، قومی ایئر لائن پیرس کیلئے ہفتہ وار دو براہ راست پروازیں چلا رہی ہے۔ ترجمان کے مطابق مسافر اپنے موبائل فون، ٹیبلٹ یا لیپ ٹاپ کے ذریعے ان فلائٹ انٹرٹینمنٹ استعمال کر سکیں گے۔ پرواز روانگی سے قبل اسلام آباد ایئر پورٹ پر تقریب کا انعقاد ہوا جس میں وزیر دفاع خواجہ آصف نے خطاب کیا،انہوں نے کہا کہ پی آئی اے، سول ایوی ایشن نے گزشتہ 4 سال بہت محنت کی، پی آئی اے کو کئی سو ارب روپے کا نقصان اٹھانا پڑا، پچھلی حکومت کی بیان بازی نے بہت نقصان پہنچایا، اب یورپ کی فضاؤں میں سبز ہلالی پرچم لہرائے گا، پی آئی اے کی پروازیں پورے یورپ میں آپریٹ کریں گی۔ انہوں نے بتایا کہ پی آئی اے برطانیہ میں بھی 3مقامات پر آپریٹ کرے گی،پیرس کیلئے پرواز 100 فیصد بک ہے۔ انہوں نے کہا کہ اس وقت پاکستان انٹرنیشنل ائیرلائن پر 800 ارب روپے کا قرض ہے۔ |
|
