| لاہور (نمائندہ جنگ) سابق وزیراعلیٰ پنجاب عثمان بزدار اور فرح گوگی کیخلاف تحقیقات کے دوران ایل ڈی اے کے ریکارڈ سے پلاٹس کی فائلز غائب ہونے کا انکشاف ہوا ہے۔
ذرائع کے مطابق عثمان بزداراور فرح گوگی نے مبینہ طور پر پوش علاقے میں کروڑوں روپے کے پلاٹس خریدے، پلاٹس کتنے میں خریدے گئے اور اس بارے میں دیگر تفصیلات کا ریکارڈ غائب ہوگیا۔
اینٹی کرپشن نے ایل ڈی اے سے 2 ارب روپے مالیت سے متعلق معاملے کی فائلز غائب ہونے پر جواب طلب کر لیا۔
ذرائع کا کہنا ہے کہ 150 پلاٹس کی فائلز ایل ڈی اے کے ریکارڈ سے غائب ہوئی ہیں، ایک ہی شخص کے نام 100 فائلیں پاور آف اٹارنی کے ذریعے منتقل کروائی گئیں، محکمہ اینٹی کرپشن نے ڈائریکٹر جوہر ٹاون اور ڈائریکٹر ہاؤسنگ معظم رشید کو آج طلب کر لیا ۔ |
|
